Abiapuntua: Koixtako uharka (955 m.). Elurretako Ama Birjinaren ermita (855 m.) eta Koixta arteko biderik laburrena da. Ez du zailtasunik, zabala da, egurra ateratzeko erabili baitzen. Bide erdian, amildegi baten gainean kokaturiko Akerreria begiratokira (1.150 metro) desbideratzeko (200 m.) aukera dago.

Aldapa piko baten ondoren, bidea Elurretako Ama Birjinaren ermitara iristen da. Azken zatian bideak bat egiten du Zentzumenen ibilbidearekin (SL-NA 61A). Ibilbide hau Koixtakoarekin lotu daiteke, hasierako abiapuntura iristen delarik.